सम्पदा संरक्षण विषयमा स्नातक तहमा अध्ययन अध्यापन हुने

भक्तपुर : सम्पदा संरक्षणका लागि दक्ष जनशक्ति उत्पादन गर्ने उद्देश्यले नेपालमै पहिलोपटक स्नातक तहमा सांस्कृतिक सम्पदा संरक्षणको अध्ययन अध्यापन हुने भएको छ । भक्तपुरस्थित रवीन्द्र पुरी फाउन्डेसन फर कन्जरभेसन (आर. पी. फाउन्डेसन) ले काठमाडौँ विश्वविद्यालयको सम्बन्धनमा सम्पदा संरक्षण विषयमा चारवर्षे स्नातक तहको अध्ययन–अध्यापन यसै वर्षदेखि सुरु गर्ने भएको हो ।

यहाँ आयोजित कार्यक्रममा काठमाडौँ विश्वविद्यालयका उपकुलपति प्रा.डा भोला थापाले अध्ययन अध्यापन कार्यको उद्घाटन गर्नुभयो । उहाँले नेपालमै पहिलोपटक सम्पदा संरक्षणमा स्नातक तहमा पढाइ सुरु हुनु खुसीको विषय भएको बताउनुभयो । सम्पदा संरक्षणको क्षेत्रमा नयाँ र दक्ष जनशक्ति उत्पादनका लागि अध्यापन सुरु गर्न आफूले भूमिका खेले पनि अब यसबाट लाभ लिन सबै पक्षको योगदान जरुरी रहेको धारणा राख्नुभयो । उहाँले सैद्धान्तिक कुराका साथै स्थलगत अभ्याससमेत गरिने यस विषयले सम्पदाको क्षेत्रमा दक्ष जनशक्ति उत्पादन गर्न नयाँ फड्को मार्ने विश्वास व्यक्त गर्नुभयो ।

कार्यक्रममा नेपालका लागि जर्मनी राजदूत डा. थोमस प्रिन्जले यस कार्यले भक्तपुरका उत्कृष्ट सम्पदाहरूको संरक्षणसँगै नेपालका सम्पदाबारे जान्न नयाँ पुस्ताका लागि अवसर भएको बताउनुभयो ।

फाउन्डेसनका प्रमुख एवं सम्पदाविद् रवीन्द्र पुरीले नयाँ पुस्तालाई सम्पदा संरक्षणमा आकर्षित गराएर देशको दक्ष जनशक्ति उत्पादन गर्न काठमाडौँ विश्वविद्यालयसँगको सम्बन्धन र सहयोगले कार्यत्रम सुरु भएको बताउनुभयो । हरेक वर्ष २० देखि ४० जना जनशक्ति उत्पादन गरिने भन्नुहुँदै उहाँले यस वर्ष २० जनाका लागि भर्ना प्रक्रिया सुरु गरिएको जानकारीसमेत दिनुभयो ।

पनौती नगरपालिकाका प्रमुख रामशरण भण्डारीले सम्पदा संरक्षण क्षेत्रमा जनप्रतिनिधिलाई समेत आवश्यक ज्ञान दिन यस कार्यक्रमले महत्वपूर्ण भूमिका खेल्ने विश्वास व्यक्त गर्नुभयो । उहाँले नगरपालिकाले यहाँको सम्पदा पूजा पद्धतिको अभिलेखीकरण सुरु गरेको बताउनुहुँदै यसमा सबैको सहयोग आवश्यक रहेको बताउनुभयो ।

कार्यक्रममा काठमाडौँ विश्वविद्यालयअन्तर्गत स्कूल अफ इन्जिनियरिङका डिन प्रा.डा मनिष पोखरेलले यहाँका अमूल्य मूर्त तथा अमूर्त सम्पदाको संरक्षणमा अध्ययन अध्यापन कार्य कोसेढुङ्गा साबित हुने बताउनुभयो ।

यसैगरी कनकमणि दीक्षितले हराएका मूर्ति फिर्ता ल्याउने काममा मात्रै नभई कला, संस्कृति र सम्पदाको संरक्षणमा लामो समयदेखि लाग्दै आएका रवीन्द्र पुरीले राज्यले गर्नुपर्ने कार्य गर्दै आएको भन्दै प्रशंसा गर्नुभयो । कला, संस्कृति र सम्पदाको संरक्षणमा सबैले सहयोग गर्नुपर्नेमा उहाँले जोड दिनुभयो ।

रासस

प्रकाशन मिति : २०८१/५/१९