बागमती प्रदेशस्तरीय धिमे बाजा प्रतियोगिता, विजेतालाई ५० हजार
२०८१ पौष १७, बुधवार
भक्तपुर, ११ पुसः नगरकोट महोत्सवलाई लक्षित गर्दै चाँगुनारायण नगरपालिकाले बागमती प्रदेशस्तरीय धिमे बाजा प्रतियोगिताको आयोजना गर्ने भएको छ ।
प्रतियोगितमा प्रथम हुनेलाई नगद रु ५० हजार पुरस्कारसहित शिल्ड, एक थान धिमे बाजा, दुई थान भुछ्या र सिछ्या प्रदान गरिने छ । द्वितीय हुनेलाई रु २५ हजारसहित शिल्ड, प्रमाणपत्र धिमय् बाजा एक थान भुछ्या एक थान, सिछ्या एक थान र तृतीय हुनेलाई नगद रु १० हजारसहित शिल्ड, प्रमाणपत्र धिमय् बाजा एक थान भुछ्या एक थान प्रदान गरिने भएको छ । सान्त्वना हुनेलाई रु पाँच हजारसहित शिल्ड, प्रमाणपत्र धिमय् बाजा एक थान, उत्कृष्ट प्रस्तुतिलाई धिमय् बाजा एक थान, उत्कृष्ट छैटौँदेखि १०औँ स्थानसम्मः भुछ्या एक–एक थान र सहभागी प्रत्येकलाई मायाको चिनो प्रदान गरिने जनाइएको छ । चाँगुनारायणको पर्यटन प्रवद्र्धनमा सहयोग पु¥याउने उद्देश्यले आयोजित धिमे बाजा प्रतियोगिता सफल पार्न वडा नं. ९ ताथलीका वडाध्यक्ष गणेश त्यातको संयोजकत्वमा प्रतियोगिता समन्वय समिति गठन गरिएको छ । प्रतियोगिताका लागि रु ११ लाखको बजेटको व्यवस्थापन गरेको र काठमाडौँ उपत्यकाका साथै काभ्रे, सिन्धुपाल्चोक, मकवानपुर, दोलखा, नुवाकोट, धादिङलगायतका जिल्ला तथा ती जिल्लाका नगरपालिका, गाउँपालिका १३ जिल्लाबाट करिब ५० वटा समूहको प्रतियोगितामा रहने छ । यही पुस १५ गतेभित्र दर्ता भइसकेको समूहले प्रतियागितामा सहभागिता जनाउन पाउने छन् । प्रतियोगितामा नेवारी खाजा तथा खाना महोत्सव पनि आयोजना हुनेछ । रासस
